Mark 15

Jesu Aheme Pairati Oni Una'i Roajina

(Matiu 27:1-2, 11-14; Ruku 23:1-5; Joni 18:28-38)

1Sú'u sú'u vea mai'o ahara sa'eme pirisiti mama'ina 'ee emaina 'ee Sikuraipia 'ee kanisorua maho'o pu pu'úmo hina vu'a 'wame areri renareja pu Jesu kamome apene Pairati mahara. 2'Ejume Pairati Hu apoma ijá 'wama 'Ú A Jua puni Kinie? 'wamana. Hu eha vene ijá 'wama A ni'waramu kajina 'wamana. 3'Ejume pirisiti mama'inapo aneja vene sisemaija Jesu namahara. 4'Ejume Pairati kú'o apoma ijá 'wama Ea mapoka A namahu kaivo 'ú A eha pu pa'waramo? 'wamana. 5'Enakaivo Jesu vu'a pina eha pa'waravumakame Pairati niho'o vwiha pa'arenana.

Jesu 'Anaa Kwahuna Nimaa Vejajina

(Matiu 27:15-26; Ruku 23:13-25; Joni 18:39-19:16)

6Jua puni tamana'omo sora ijuri vea rejukavi'i tipurea irá ea mapoka'e ura renaujaho ranavu'e samai va'una. 7Nimarako kamati pu'úmo Parapasi 'arahareja ea 'aniuma kwamasahume tipura hijara. 8Eaka mapokijipo roe rora kaji nami'i kaivo ijá 'umeja Pairati a nitama venuja'ina'e iviamaa 'u'o ija'ina vena 'umejara. 9'Ejume Pairati eha vena ijá 'iama Ja ura na Jua puni Kiniji rana'ejo? 'iamana. 10Pairati henajaho pirisiti mama'ina Jesuna'i senama parania jihuna'e hu mahara. 11'Enakaivo pirisiti mama'ina vejume ea mapoka Pairatira Parapasi ranahuna'e 'waravara. 12'Ejume Pairati kú'o eha vena ijá 'iama Ja ea ka'ene Jua puni Kinia 'úvukaho na Hu ichá ve'ejo 'iamana. 13Pu ajira ijá 'umeja Icha 'ahi nerui 'anaa 'umejara. 14'Ejume Pairati ijá 'iama Rakijihuna'e? Hu iraka sisea venane? 'iamana. 'Enakaivo pu niho'o ajira ijá 'umeja Icha 'ahi nerui 'anaa! 'umejara. 15Pairatira ea mapoka teamana'amarono Parapasi ranavuma va'ana. Hu 'waravume pwehwapo Jesu hijahe 'ee hirisima mihume pu apena va'e korosia 'ahi 'anahuna.

Sorutiapo Jesu Sipana Asutiajina

(Matiu 27:27-31; Joni 19:2-3)

16'Ejume sorutiapo Jesu apena va'e ea natohwijihuni sei rana'i kaivo sorutia mapoka 'umenaume nianaa roara. 17'Enareja iji'a pu ateha jopatu'uma'ura kaivo avi'ina niho'o mavarasa'ina apúsamahe 'wija ehima apene húmata 'ahi apúsamahara. 18'Ejume pu 'ijahareja 'ajoma ijá 'wava Esi A Jua puni Kinia 'wavara. 19Pu puapi 'uhua apene húmata 'ahi 'anae cheri 'otie Huni una'i nitupari same nuana vetiara. 20Pu Jesu matahareja iji'a ateha avi'ina jopatu'uma'ura kajaho tasioma'i kaivo Huni ateha sahasa samahara. Ijá venareja iji'a Jesu apena va'e icha 'ahi nerui 'ana'iro va'ara.

Jesu Korosi 'Anaajina

(Matiu 27:32-44; Ruku 23:26-43; Joni 19:17-27)

21Saimani Sairini ora hu Arekisanita'o Rupasi'o puni oma'omo nechi'i rena roe vwama rori namijuma kamareja sorutia kajipo hu 'ejahae Jesuni korosia tapana va'a 'wavara. 22'Enareja pu Jesu apena va'e Korukata va'ara. Korukata 'wavajihuni maijaho Húmata Ata 'wavura. 23'Ejume pu ajina riha kisini 'úsiji'i ahuma amairiareja Jesu mahara kaivo Hu painana. 24Iji'a pu Hu korosia 'ahi 'anaareja Huni ateha 'eke pipi vejume ea ani ani 'ekara. 25Sú'u vea ajima ro'eme pu Jesu korosia 'ahi 'anaara. 26Pu korosiaka Hu 'anaari 'ahi huriji asura ika'ina vejara Ikaho Jua Puni Kinia 'wavara. 27Ea no'o ea 'anie nesa apeju jihuna'e Jesu pu'úmo korosia 'ahi pina Huni ana'inija'i 'anae pina Huni mana'inija'i 'anaara. 28Nitama Godoni irijara 'waramarena Hu ea sisea pu'úmo icha 'ahi 'ana'eja 'iamajara roe nimaa renana. 29Ea kajija korosia aneja kaji ruvai'i matahe nuana achihe ijahi'i ijá 'wava Eeee! Ara Temiporu veje au'ira'omo na'ia no'opisu pa'are'eje A 'warave ara kajaho kú'o ve'ena 'úmanakúna 'wavara. 30Orono korosi 'aha kaji ni'ajarame ariha roe kava 'wavara. 31'Unama nikwinu'ina kajino pirisiti mama'ina 'ee Sikuraipiepo Hu matahareja ijá 'wava Hu ea 'aho'a ni'ajihu ja'ina'e Hu ori'ina areri pani'ajaramu 'wavara. 32A nimaa Keriso Isureri opuni Kiniakúna A iviamaa orono ariha roa kamareje nú A nimaa roja 'wavara. Ea ka'ene korosia 'ahi pu pu'úmo 'aniajija 'u'o Jesu sivaa 'waravara.

Jesura Kwamajina

(Matiu 27:45-56; Ruku 23:44-49; Joni 19:28-30)

33Vei riri kwaaka mapoka kajaho na'ima namapena va'o va'ume nusirei vea tiria koroku apenana. 34'E'eme nusirei vea tiria korokuijino Jesura ajira ijá 'umena Eroi Eroi rama sapakatani 'umenana. Jesu ija'ina 'warama jihuni maijaho Nuni Godi Nuni Godi iraki jihuna'e A Na pataaroriho? 35Hura 'umena kaji ea ka'ene rori namija kajipo henareja ijá 'wava Heha! Hu Iraija 'umenu 'wavara. 36Ea kwino ninuma va'e 'oasuni apene icha 'ahi vevaha'ika'i ajina riha kikisima'ura vaji apúsame i'amarono apena ma'iro ve'ika'i hu ijá 'iama Ja mare'e Iraijara ro 'unaa mwe'i ranava kava 'wavara. 37'E'eme Jesu niho'o ajira 'ume'i kaivo kwamana. 38Temiporu vaji ateha ka'ene uranavujaho rira mu'oi kahi huri rene isome va'e kami tihi 'e'une no'ohe'i rejara. 39Sorutia puni namikii Jesuni una'i namiji'i kavume Jesu oja suavuma kamarena hu ijá 'iama Niho'o nimaa nimaa Ea ikaho Godoni Hariha 'iamana. 40Napara 'aho'a 'u'o Karari namiji'i kavara. Ijihipuni vajijaho Meri Matarini Saromine 'ee napara pina Meri ka'ene Josisi huni 'u'ua Jemisi puni oha'omo napara kajihi pu'úmo namijara. 41Vea ka'ene Jesura Karari hinajaho napara kajija Hu 'ararihae one 'ee Huni ira hene vene 'ee ni'ajahura. 'Ee napara 'aho'a mapoka ka'ene pu pu'úmo Jerusaremi roajija 'u'o ijí namijara.

Jesu Kwananavajina

(Matiu 27:57-61; Ruku 23:50-56; Joni 19:38-42)

42Sapati vea re'avarono amairiara'eme nusiremana. 43Josapi ka'ene Aramatia ora kanisorua pina ea mapoka hu hena kavura'omo hu Godoni arijara rohuniji 'ajaha hiji'ina'omo hu roe pajuvi'i Pairati oni va'e Jesuni hahiji ape'i 'waramana. 44Pairati Hura marako kwamaji henarena niho'o puruva renana. 'Ejume sorutia puni namikia apoma 'waramana 'Ú Jesuho nikwamana ho pane? 'wamana. 45'Ejume namikia kajara Jesu nikwamana 'wavume Pairati henarena Josapi 'waravume hu apena va'e kwanana'iro va'ana. 46'Ejume Josapi va'e ateha 'imene roe hu Jesu korosi 'ahi apene ateha kaji mwame apene va'e muna ara ka'ene mai'o 'uhuajihuni vaji rana'ika'i muna tahuma apene ira tanunanamana. 47Napara pina huni iha Meri ka'ene Matarini 'ee pina Meri ka'ene Josisi oni oha'omo pu no'o Jesuni ruha ka'ene ranavajaho hami kavara.